प्रदेश जनस्वास्थ्य कार्यालय, जोमसोम, मुस्ताङ

यस हिमाली जिल्ला मुस्ताङमा अवस्थित प्रदेश जनस्वास्थ्य कार्यालय, जोमसोम, मुस्ताङ वि.सं. २०७५ मा स्थापना भई गण्डकी प्रदेश सरकार अन्तर्गत कार्यरत छ । विगतमा जिल्ला स्वास्थ्य कार्यालयको नामबाट परिचित प्रदेश जनस्वास्थ्य कार्यालय, जोमसोम, मुस्ताङ देश संघियताको ढाँचामा गए संगै स्वास्थ्य कार्यालयको रुपमा मुस्ताङ जिल्लाको घरपझोङ गाउँपालिका-४, जोमसोममा स्थापना भएको हो । कार्यालय आफ्नो जग्गामा रहेको तिन तले पक्की भवनमा ब्यवस्थित रुपमा संचालनमा रहेको छ । यस कार्यालयले गुणस्तरीय स्वास्थ्य सेवा प्रवाहको माध्यमबाट मुस्ताङ जिल्लाको समग्र स्वास्थ्य स्थितिलाई सुधार गर्नको लागि यहाँका पाँच वटै स्थानीय तहहरुबाट प्रदान गरिने प्रवर्द्धनात्मक, प्रतिकारात्मक र उपचारात्मक स्वास्थ्य सेवामा सहजिकरण, समन्वय र सहकार्य गर्दै कार्य संचालन गर्दै आएको छ । स्थानीय तहमा कार्यरत स्वास्थ्यकर्मीहरुको क्षमता अभिबृदिका लागि विभिन्न तालिमहरु संचालन गर्नुका साथै जनस्वास्थ्यका विभिन्न कार्यक्रमहरुको कार्यान्वयनको स्थलगत सुपरीवेक्षण, अनुगमन गरि सुधारका लागि सुझाव पनि प्रदान गर्दछ । यसका साथै स्वास्थ्य कार्यालयको कार्य विवरण भित्र रहेका विविध कार्य सम्पादन गर्दै आइरहेको छ । यस जिल्लामा १ सरकारी अस्पताल, १ प्राथमिक स्वास्थ्य सेवा केन्द्र, १५ स्वास्थ्य चौकी, ४ आधारभूत स्वास्थ्य सेवा केन्द्र र ३ सामुदायिक स्वास्थ्य ईकाइ गरि २४ स्वास्थ्य संस्था अन्तर्गत २२ गाउँघर क्लिनिक, २७ खोप केन्द्र र १४४ जना महिला सामुदायिक स्वास्थ्य स्वयंसेविकाहरु छन् ।